بــــــــقـايـا إنــــــسـان 

إحترت كثيرا فى إختيار العنوان ولكنى لم أجد سوى هذا العنوان 

وإحترت كثيرا فيما سوف أكتبة فى هذا الموضوع فلم أتحدث عن نفسى سابقا 

فى البداية هذا تعريف بسيط عن نفسى 

الإسم : مش مهم 

السن : مش كبير ولا صغير

العنوان : فى بيتنا 

رقم الموبايل : مش حافظة 

مش فاكر إية تانى اللى بيتكتب لما حد يقدم على وظيفة ويقولولة فوت علينا كمان سنة 

بس اللى أنا فاكرة وعايز أتكلم فية أنا مين ولية وإزاى 

شخصيتى هو دة المهم 

يمكن زى ماقلت فى البداية إنى إحترت أتكلم إزاى أو أبدأ منين أو أتكلم فى إية 

بس وصلت إنى لأول مرة هتكلم عن نفسى زى مانا شايفها 

يمكن أو أكيد حد تانى غيرى شايفها مش كدة بس أنا هقول رئيى فى نفسى 

أولا كلامى زى ماقلت علشان أكيد حد شايفة مش هيبقى مظبوط ف دى هتبقى وجهة نظرة اللى أنا أكيد لازم أحترمها 

ودة جزء من شخصيتى 

مبدأيا وهتكلم فى النقطة اللى فاتت لإنها اللى خلتنى أتكلم إنهردة كلام حد وجهه ليا بإنى شخص ..................

والنقط دى حاجات كتير يمكن هو شايفنى كدة ودى وجهة نظرة أنا بحترمها 

بس ياترى وجهة النظر دى قائمة على إية 

يعنى مينفعش علشان أنا بضحك وبهزر يتقال عليا إنى شخص تافه 

لأ عادى هو دة الطبيعى على فكرة 

إية دة هو أنا بناقد نفسى 

لأ مش بناقد نفسى ولا حاجة أنا بقول لو دى شخصيتى على طول يبقى أنا كدة فعلا 

يمكن الشخص اللى أنا مش هو بئة إنتقدتة بردة مش هو اللى إنتقدنى أنا شفتة من جانب واحد فى شخصيتة 

الكلام دة مينفعش خالص 

والكلام دة هيدخلنى فى  كلام تانى مهم أنا عايز أتكلم فية فى الحب علشان كدة الموضوع دة مهم جدا 

هاخدكم شوية بعيدا عن الواقعية وهنروح للرومانسية ودى الجانب الأخر فى شخصيتى 

كنت قلت فى موضوع ليا فى مدونة عيشها بشكل التالت اللى بتتكلم عن الرمانسية إن فى فرق كبير أوى بين الحب والإعجاب 

وإن الإعجاب بداية أو المرحلة الأولية للحب 

لما نشوف جانب فى شخص ونحبة فية دة إسمه إعجاب مينفعش يبقى حب لكن لما تتكمل جوانب الشخصية اللى قدامنا 

ونعرفها بمميزاتها وعيوبها ونقبلها يبقى إنتقلنا من مرحلة الإعجاب لمرحله الحب 

نرجع تانى للواقعية ونتكلم عن الجوانب اللى لازم نشوفها فى الشخص اللى قدامنا 

أولا قبل ماننتقد شخص فى حاجة نبص لنفسنا نشوف إحنا فينا العيب دة ولا لأ 

ثانيا الشخص دة مينفعش ننتقدة فى جانب واحد يعنى زى ماقلت لو هو بيهزر طول الوقت يبقى أنا أول واحد هقول علية شخص تافه

لكن لما تلاقى الشخص دة زى باقى الناس لما بيبقى زعلان بيعيط ولما بيبقى فرحان بيدحك وبيهزر وساعات هزارة دة وهو زعلان 

بردة هناقد نفسى 

لأ دة مش تناقد دة تعبير الشخص عن نفسة فى حاجة هو شايفها إن هو بيحب يعملها لما يكون زعلان 

يعنى ممكن واحد وهو زعلان يدحك  مع إن الطبيعى إنة يعيط الشخص دة شخصيتة كدة بس فى جوانب تانية نعرفها منه وتكتمل شخصيتة بيها 

مش عارف لحد كدة كلامى مفهوم ولا لأ 

بس أنا هتكلم عن نفسى بئة شوية

أنا شخص عادى جدا شايف نفسى كبير جدا الحمد لله مش بسنى لكن بعقلى 

عديت مرحله المراهقة المتأخرة اللى هى بعد مرحلة المراهقة المتقدمة والوسطى من زمان 

عشت مرحله مراهقة زى أى حد بس عيشتها بدرى شوية مش عارف دة عيب ولا ميزة 

بحب الحياة جدا زى ماهى يعنى الحياة مش بمبى ولا حاجة بس أنا بحبها علشان دة الواقع بتاعها 

مش شيخ ولا واد سيس بس بحاول أكون إنسان صح 

بفرح لما الاقى حاجة فى حياتى تفرحنى وبزعل لما تحصل حاجة فى حياتى تزعلنى 

واقعى لكن بحب الرومانسية 

فى النهاية أنا بقايا إنسان أتألم ولكنى أتعلم 

أفرح ولكنى أعلم أن الفرح لن يدوم

أحزن ولكنى على يقين إن بعد العسر يسر 

متفائل حتى أكون قادر على مواجهة الصعاب 

قانع لأنى أدرك أن القدر سوف لا يتغير 

دموع الواقع
بكى الواقع حتى نزلت الدموع
فسألته لماذا فأجاب أريد الرجوع

فقلت له لقد أصبح شىء ممنوع
أن تعود إلى الدنيا فصرخ بصوت مسموع

حتى وصل بكائه إلى قلبى وبين الضلوع
وأحسست بحزنه وأنه موجوع

أتعلمون ماهو الواقع المخدوع
إنه الحبيب الذى يجول فى كل الربوع

يظن أنه تاجر وأن الحب مشروع
فيتاجر فى القلوب ليحصل على شهادة أو مجموع

الدنيا


سحاب يمر فى السماء
بشر يعيشون فى مشقة وعناء
وأخرون يحلمون باللقاء
الأغنياء يحلقون فى الفضاء
وتحت التراب يعيش الفقراء

الدنيا

هى الدنيا وأنا إنسان
تائه أبحث عن مكان
تركتها فطاردتنى الأحزان
حتى أصبحت لا أستطيع النسيان
وفقدت الأمل فى أن أجد الأمان

الدنيا 



بشر يرتدون القناع
وأخرون يسمون الرعاع
هى الدنيا التى إختفى كل شىء فيها وضاع
أخلاق وشرف وأمانه وصدق الكل الأن يباع
هى الدنيا التى أريد أن أقول لها وداع

ع الكورنيش

ع الكورنيش دة مش إسم الموضوع أو عنوانة 

دة يوم فى حياتى قضيتة ع الكورنيش
بس مش كورنيش القاهرة لأ كورنيش الزقازيق الدولى
المهم إنى كالعادة لما بروح الكورنيش بيبقى علشان حاجة من الإتنين
يا مخنوق يا مخنوق أو مخنوق
رحت الكورنيش وبردة كالعادة قعدت ع النيل بس المرة دى كانت مختلفة جدا
المرة دى لقيت إن فى مكان كدة ممكن أنزل منه قريب جدا من النيل
ف نزلت وقعدت قدام النيل بظبط
وكنت هقع كمان بس ربنا ستر
المهم علشان أنا مش بحب الرغى إنى لقيت نفسى أول ما قعدت
على أساس إنها كانت تايهه يعنى 

المهم 

وبصيت كدة على ........................ طبعا كله هيبص معايا ع النيل
بس أنا مبصتش بقى ع النيل
أنا بصيت للقمر ف السما
حد هيقولى ياعم مانت ممكن تشوف القمر وإنت ف بيتكم 
من غير ما تقرفنا وتروح الكورنيش وتقعد ع النيل
هقوله عندك حق بس طبعا الإحساس مختلف 
وجو النيل مع القمر والليل مع النجوم وإنت لوحدك
بتفرق كتير أوى
لما قعدت لوحدى وسرحت مع القمر وأنا قدام النيل والنجوم ف السما
تقريبا كنت عايز أعيط
لية معرفش بس فجأه لقتنى بدحك وبقول لنفسى هو أنا مينفعش أقعد ف بيتنا وأعيط
ولا هو لازم كل ما أحب أعيط أجى هنا
وبدل ما أعيط المرة دى دحكت وقلت لنفسى تانى ياترى أنا جاى هنا لية
أكيد علشان مخنوق زى كل مرة .. 
مانا عارف بس اللى مش أكيد إن السبب يكون واحد
ماهو علشان أبقى مخنوق لازم يبقى فى سبب مينفعش أبقى مخنوق لوحدى
لقيت إن المرة دى سبب إنى مخنوق أكتر من أى مرة أنا كنت مخنوق فيها
والسبب فعلا يستاهل إنى أجى المكان دة
لقيت إنى مقصر أوى ف حق نفسى وجاى عليها كتير
ودة كله علشان إية مش عارف
أو عارف بس بستهبل
فكرت إنى مستهبلش قبل ما أروح معرفتش
بس لما رحت وقعدت ع الكورنيش فكرت إنى لازم تبقى نفسى هى أنا
وأنا جزء من شخصية نفسى
طبعا محدش فاهم حاجة من الرغى دة كله
بس ببساطه جدا كل واحد فينا ومش أنا لوحدى بعيد عن نفسة ومبيحاولش يقرب منها
أنا إمبارح إعتبرت نفسى واحد صاحبى وقعدت أكلمها حد هيقول إنى مجنون ماهو مبيعملش كدة غير المجنون
هقوله لأ مبيعملش كدة غير العاقل اللى عايز يعيش حياته صح
فكرت ف حاجات كتير أنا ونفسى وحاسبتها على حااجات كتير
أنا اللى مقصر فيها مش هى
وإكتشفت إن نفسى هى أنا وبردة مكنتش مجنون
مش مهم مين اللى طلع غلطان لإن أنا أكيد اللى طلعت غلطان 
المهم إنى إعترفت بغلطى وقررت إنى أتعلم منه
أهم حاجة فكرت فيها مع نفسى إنى أخد قرار إنى مجيش الكورنيش تانى
بس للأسف معرفتش أخد القرار لإنى أخدت قرار تانى 
إنى هروح الكورنيش أنا ونفسى علشان نتفسح هناك

ياترى حد جاى معايا ولا محتاجين تروحوا مرة قبل الفسحة 




حاول تصالح نفسك

حاول تكون مرتاح

دور على نفسك جواها

وياريت تعيش معاها

وتتعلم من اللى راح 



حاول مجرد محاوله إنك تفكر وتاخد قرار

مش مهم تغلط أو يكون فى سوء إختيار

بس المهم تتعلم من الغلط ومتختارش الهروب من الواقع أو الفرار

دمــــــــــوع

دائما وحين أشعر بأى إحساس يجتاحنى أريد أن أعبر عنه ولكنى دائما ما أحاول أن أخبىء دموعى أو همومى بداخلى

ولكنى لا أعرف ما الشىء الذى دفعنى لأن أمسك بقلمى لأعبر عن إحساسى الأن

ربما هى الدموع التى أرادت أن لا تنسكب على الأرض فأكتب بها وربما هو اليأس الذى يجتاحنى وربما هى حالة من الخوف

ربما ولأول مرة أشعر بهذا الإحساس الغريب

الأن وأنا أكتب تمر أمامى أيام فى حياتى لم أكن لأتذكرها إلا وأنا أبكى

تمر أمامى بعض المواقف التى من المفترض أن تضحكنى ولكن

أتذكر الأن ما كنت أكتبة حين أكون فى قمة السعادة ولكن

أحاول أن أقنع نفسى بالحقيقة وهى أننى أعيش فى الحياة ولست أعيش فى عالم آخر بعيدا عن البشر

فالواقع يفرض نفسة ليقول تذكر وأنت سعيدا أنه سيأتى الوقت الذى تبكى فية وتذكر وأنت تبكى أن الدموع ستجف وأن الحياة سوف تستمر

ولـكـن

ربما لا يستطيع قلمى أن يعبر عما بداخلى وربما كانت الدموع غير قادرة على أن تريحنى ولكن

مازلت أتنفس وينبض قلبى وتنسكب دموعى

وتبقى الدموع هى المحطة الوحيدة التى يقف فيها قطار حياتى 

تبقى الدموع والأهات هى الذكرى التى أتذكرها دائما حين أكون وحيدا 

الدموع التى تنزرف من عينى لا تدل على ضعفى وإنما تعبر عن شعور بداخلى 

ربما يكون هو الواقع الذى لا أريدة وربما يكون هو القطار الذى سبق وتعطل فى الرحله الماضية

هو نفس القطار الذى صعدت إلية 

ربما تكون حياتى أصبحت مليئة بالأحزان وربما أصبح الشعور يسيطر على كيانى 
 
ربما هى تلك الكلمات السابقة التى إنزرفت من عيناى لتكتب على أوراقى وربما تكون كلمات أخرى ودموع أخرى 
 
لا أعلم أو ربما لا أعلم ما الذى أفعله كى أستطيع الوصول إلى محطة السعادة 
 
أهو القطار أم هى الحياة 
 
أى منهما لا يريدنى أن أصل 
 
ربما لا أحد ولكنى فى النهاية غير قادر على الوصول

سؤال يطرح نفسة فى كل موضوع لأبدأ فى الكتابة
إلى متى سننتظر النهاية قبل البداية ؟؟
دائما وحين أسمع أحد الأفلام ولست أنا فقط بل الكل ينتظر النهاية قبل البداية أو ربما بعدها لا أعلم

النهايه

فكرت كثيرا وبحثت كثيرا وفى النهايه لم أصل إلى النهايه
سألت نفسى بعض الأسئلة
لماذا أبحث عن الشمس فى ظلام الليل
ولماذا أنتظر أن يضىء القمر النهار

تناقد غريب فى أوراقى
ربما يأتى التناقد من البحث عن الشىء الموجود داخل الشىء المفقود
وربما يأتى نتيجة لعدم البحث عن الشىء المفقود نفسة

لا أعلم ولكن

ربما تكون هى النهاية المتوقعة وربما تكون غير ذلك


أرانى أنظر الأن إلى البحر لأرى نهايتة
هل سينتهى ؟
أو أرانى أنظر إلى السماء
هل أستطيع الوصول إليها ؟؟



ربما يكون البحث عن النهاية هو بداية الطريق للبحث عن الذات
أحاول أن أصل إلى نهاية كل شىء فى حياتى
أرهقنى التفكير فى أن أحدد ما الذى أريد الوصول إلى نهايتة
وأرهقنى البحث فى الوصول إلى نهاية ما أردت أن أصل إلى نهايتة


فقط أردت أن أصل إلى النهاية ولكن فى النهاية قررت أن أنتظر ليقرر القدر
ولكنى الأن أتخيل نفسى وحيدا فى الظلام فى الشتاء فى الليل تحت المطر